Сенатор Санкт-Петербург шаҳрида сайлов институтига бағишланган халқаро конференцияда иштирок этди

Тошкент, Ўзбекистон (UzDaily.uz) — Сенатнинг Суд-ҳуқуқ масалалари ва коррупцияга қарши курашиш қўмитаси раиси Абдулхаким Эшмуратов Россия Федерациясининг Санкт-Петербург шаҳрида МДҲ Парламентлараро Ассамблеяси томонидан ташкил этилган “Сайлов ва референдум институтига ишончни ошириш: халқаро кузатувнинг ўрни” мавзусидаги халқаро конференцияда иштирок этди.

Тадбирда сайловлар ва референдумларни халқаро кузатиш фаолиятини такомиллаштириш, ёшларининг электорал маданиятини шакллантириш, сайлов жараёнига замонавий ахборот-технологияларни жорий этиш, сунъий интеллект ва унинг сайлов жараёнида қўлланилиши, комплекс ёндашув ва қонунчилик билан сайлов жараёнини тартибга солиш каби масалалар муҳокама қилинди.

Анжуман доирасида сенатор сайлов комиссияларининг мустақиллиги, сиёсий партиялар учун тенг шарт-шароит яратилиши, фуқароларнинг сайлаш ва сайланиш ҳуқуқларининг амалдаги кафолатлари, ахборот-коммуникация технологияларини кенг жорий этилиши, сайлов жараёнининг очиқлиги ва шаффофлиги каби миллий сайлов тизимининг муҳим жиҳатларини таъкидлаб ўтди.

Конференция иштирокчилари томонидан сўнгги йилларда Ўзбекистонда сайлов ва референдумлар ўтказишнинг ижобий амалиёти алоҳида қайд этилди.

Тадбир доирасида Ўзбекистон Республикасида сайлов ташкил этиш ва ўтказишга оид қонунлар ҳамда китоблар кўргазмаси ҳам бўлиб ўтди.