Сенатда Япониянинг Ўзбекистондаги янги элчиси билан учрашув бўлиб ўтди

Тошкент, Ўзбекистон (UzDaily.uz) — Жорий йилнинг 2 декабрь куни Олий Мажлис Сенати Раисининг биринчи ўринбосари Содиқ Сафоев Япониянинг мамлакатимизга янги тайинланган Фавқулодда ва Мухтор Элчиси Кэндзи Хирата билан учрашди.

Учрашувда кун тартибидаги тадбирлар, парламентлараро мулоқот, иқтисодиёт, илм-фан ва олий таълим соҳаларидаги ҳамкорликнинг бугунги ҳолати ва истиқболлари юзасидан фикр алмашилди.

Хусусан, икки томонлама иқтисодий, инвестициявий, илмий-техникавий алоқалар кўламини кенгайтиришда ҳамкорликнинг янги йўналишларига эътибор қаратиш лозимлиги таъкидланди.

Ўзбекистон ва Япония парламентлари ўртасидаги мулоқотни ривожлантиришда Олий Мажлис Сенати ва Қонунчилик палатасида тузилган ҳамкорлик гуруҳлари ҳамда Япония парламентининг Ўзбекистон билан дўстлик лигасининг ўрни ва аҳамияти алоҳида эътироф этилди.