Тошкент, Ўзбекистон (UzDaily.uz) — 15 май куни, Олий Мажлис Сенати Раисининг биринчи ўринбосари Содиқ Сафоев Венгриянинг Ўзбекистондаги Фавқулодда ва Мухтор Элчиси Йожеф Родж билан учрашди.

Суҳбат чоғида Ўзбекистон ва Венгрия ўртасидаги амалий ҳамкорликнинг жорий ҳолати ва истиқболлари муҳокама қилинди. Жумладан, икки давлат парламентларининг ўзаро ҳамкорлигини янада фаоллаштириш, таълим соҳасида тажриба алмашиш ва халқаро парламент ташкилотлари доирасида ҳамкорликни кенгайтириш муҳимлиги таъкидланди.

Бундан ташқари, томонлар икки мамлакат ўртасидаги иқтисодий, савдо ва маданий алоқаларни янада мустаҳкамлаш имкониятларини кўриб чиқдилар.

Учрашув давомида мунтазам алоқаларни давом эттириш ва икки томонлама ҳамкорликни чуқурлаштиришга қаратилган қўшма тадбирларни ташкил қилиш бўйича келишиб олинди.