Тошкент, Ўзбекистон (UzDaily.uz) — 2025 йил 4 март куни Олий Мажлис Сенати Раисининг биринчи ўринбосари Содиқ Сафоев Вьетнам Социалистик Республикаси ташқи ишлар вазири ўринбосари Ле Тхи Тху Ханг бошчилигидаги делегация билан учрашув ўтказди.

Учрашув чоғида Ўзбекистон ва Вьетнам ўртасидаги ҳамкорликни кенгайтириш масалалари муҳокама қилинди.

Таъкидланганидек, Ўзбекистон Вьетнамни Жануби-Шарқий Осиёдаги муҳим ва ишончли ҳамкорларидан бири сифатида кўради. Икки мамлакат ўртасидаги алоқалар, жумладан, сиёсий, савдо-иқтисодий, инвестиция ва маданий-гуманитар соҳаларда катта салоҳиятга эга экани қайд этилди.

Учрашув давомида томонлар олий ва юқори даражадаги ташрифларни ташкил этиш бўйича фикр алмашдилар. Шу муносабат билан, икки мамлакат ўртасидаги сиёсий мулоқотни фаоллаштириш, парламентлараро ҳамкорликни мустаҳкамлаш ва ўзаро манфаатли лойиҳаларни амалга ошириш муҳимлиги таъкидланди.

Шунингдек, икки давлат ўртасидаги алоқаларни ривожлантиришда парламент дипломатиясининг, жумладан Сенатнинг роли ошиб бораётгани қайд этилди. Шу муносабат билан, жорий йилнинг 5-9 апрель кунлари Тошкент шаҳрида бўлиб ўтадиган Парламентлараро иттифоқнинг 150-юбилей ассамблеясида Вьетнам парламенти раҳбарлари ҳам иштирок этишга катта қизиқиш билдирганлиги қайд этилди.

Учрашув якунида томонлар Ўзбекистон ва Вьетнам ўртасидаги ҳамкорликни ривожлантириш борасида конструктив мулоқот ва қўшма ташаббусларни қўллаб-қувватлашга тайёр эканликларини билдирдилар.