Тошкент, Ўзбекистон (UzDaily.uz) — 2025 йилнинг 24 февраль куни Сенат Раиси Танзила Нарбаева Корея Экспорт-импорт банкининг Ўзбекистондаги ваколатхонаси раҳбари Канг Санжин билан учрашди.

 Учрашувда Жанубий Корея ва Ўзбекистон ўртасида мустаҳкам дўстлик алоқаларининг ривож топаётганлиги алоҳида таъкидланди.

Томонлар икки мамлакатнинг барча йўналишлардаги ҳамкорлиги, айниқса таълим ва соғлиқни сақлаш соҳаларидаги қўшма лойиҳалар ижобий натижалар бераётгани юзасидан фикр алмашди.

Бундан ташқари, Ўзбекистонда хотин-қизлар тадбиркорлигини ривожлантиришга қаратилган дастурни амалга оширишда Корея Экспорт-импорт банки билан ҳамкорликни давом эттириш масаласи муҳокама қилинди.

Бу борада тажриба алмашиш ва янги лойиҳаларни ишлаб чиқишга эътибор қаратилди. Канг Санчжин ушбу лойиҳаларга зарур кўмак кўрсатишга ҳамда Ўзбекистонда тадбиркорлик муҳитини ривожлантиришга қаратилган ташаббусларда иштирок этишга тайёрлигини билдирди.