Тошкент, Ўзбекистон (UzDaily.uz) — 2025 йилнинг 20 февраль куни Олий Мажлис Сенати Раиси Танзила Нарбаева Канаданинг Ўзбекистондаги янги элчиси Кристофер Дугган билан учрашди.

Суҳбат аввалида мамлакатимиз юқори палатаси раҳбари дипломатни вазифасига киришиши билан қутлаб, унинг Ўзбекистон ва Канада ўртасидаги муносабатларни янги босқичда ривожлантиришига ишонч билдирди.

Таъкидланганидек, ҳозирги вақтда Ўзбекистон Марказий Осиё ва дунёнинг нуфузли давлатлари билан фаол-очиқлик тамойилларига мос ташқи сиёсат олиб бормоқда. Президент Ш. Мирзиёевнинг халқаро миқёсдаги прагматик сиёсати туфайли мамлакатнинг жаҳон майдонидаги яқин ҳамкорлари сони ортиб бормоқда ва нуфузи юксалмоқда.

Ўзбекистон-Канада ҳамкорлиги йўлга қўйилганидан буён ўзаро муносабатларда бир қатор ижобий натижалар қўлга киритилиб, савдо-иқтисодий ҳамкорлик ривож топмоқда.  Бугунги кунда икки давлат ўртасида 40 дан зиёд қўшма лойиҳалар  мавжуд. Уларнинг 10 таси Канада улушига тўғри келади.

Лекин ҳали рўёбга чиқмаган катта салоҳият ва имкониятлар ҳам бор. Таъкидланганидек, улар ишга солинса, икки давлат ўртасида кўпқиррали муносабатларни янада ривожланади. Инвестиция, фан-таълим, туризм каби йўналишлар шулар жумласидандир.

Хусусан, аҳолиси қарйиб 38 миллионга етаётган Ўзбекистонда ҳар йили 600 минг ёшлар меҳнат бозорига кириб келмоқда. Канадада ҳам иш кучидан самарали фойдаланиш муҳим саналади. Шу боис ёшларни меҳнатга жалб қилишда ҳам ўзаро тажриба алмашиш жорий этилса, ўзаро муносабатларни янги босқичда ривожлантириш мумкин бўлади, – деди Сенат Раиси.

Шунингдек, суҳбат давомида икки давлатнинг биродарлашган шаҳарлари ўртасида дўстлик ришталарини янада мустаҳкамлаш, инвестиция киритиш орқали савдо-иқтисодий ҳамкорликда юқори натижаларга эришиш имкониятларига урғу берилди. Бугун дунё аҳлини ўйлантираётган яшил оламни асрашда бирлашиш лозимлиги таъкидланди.

Томонлар парламентлараро алоқаларни ҳамкорлик бўйича дўстлик гуруҳлари фаоллигини оширган ҳолда изчил давом эттириш муҳимлигига эътибор қаратди. Бунда аниқ мақсадли режалар ишлаб чиқиб, қонунчилик, инсон ҳуқуқ ва манфаатлари йўлида биргаликда иш олиб боришдан томонлар манфаатдор экани қайд этилди.