Тошкент, Ўзбекистон (UzDaily.uz) — Жорий йилнинг 15 май куни Сенат Раиси Танзила Нарбаева АҚШнинг Юта штати Сенати Раиси Стюарт Адамс бошчилигидаги делегация билан учрашди.

Учрашувда Ўзбекистон ва АҚШ муносабатларининг ижобий суръати, шу жумладан, парламентлараро алоқалар кенгайиб бораётгани таъкидланди. Шу нуқтаи назардан АҚШ Конгрессидаги “Ўзбекистон бўйича кокус” ва Олий Мажлисдаги  Парламентлараро ҳамкорлик гуруҳининг фаолияти юқори баҳоланди.

Томонлар икки томонлама ҳамкорликнинг асосий йўналишларини, шу жумладан, қонун ижодкорлиги соҳасида тажриба алмашиш, таълим ва ижтимоий лойиҳаларни амалга ошириш, шунингдек, парламент дипломатияси доирасида шерикликни кенгайтириш масалаларини муҳокама қилди.

Учрашув якунида томонлар Ўзбекистон ва АҚШ ҳамкорлигини янада чуқурлаштириш, шу жумладан, уни минтақавий ва парламентлараро даражада ривожлантиришдан ўзаро манфаатдор эканлигини  тасдиқлади.