Тошкент, Ўзбекистон (UzDaily.uz) — 2025 йилнинг 26 февраль куни Олий Мажлис Сенати Раиси Танзила Нарбаева Саудия Арабистони “ACWA Power” компаниясининг Ўзбекистондаги ваколатхонаси раҳбари Жон Заиди билан учрашди.

Суҳбат чоғида икки мамлакат раҳбарларининг дўстона муносабатлари ва сиёсий иродаси туфайли Ўзбекистон-Саудия муносабатлари янада ривожланиб, ҳамкорлик жадал суръатда кенгаяётгани, йирик инвестиция лойиҳалари, энг аввало, энергетика соҳасида илгари сурилаётгани юқори баҳоланди.

Қайд этиш жоизки, бугунги кунда Саудия Арабистони Қироллигининг Ўзбекистонга киритган инвестицияларининг умумий ҳажми 27,3 млрд долларни ташкил этиб, 59 та лойиҳани қамраб олган.

Шу жумладан, “ACWA Power” компанияси мамлакатимизнинг турли ҳудудларида энергетика инфратузилмасини модернизация қилиш ва яшил энергетикани ривожлантириш бўйича йирик лойиҳаларни илгари суришга ҳисса қўшаётгани, Ўзбекистонинг яшил энергия соҳасида стратегик ҳамкорига айлангани алоҳида қайд этилди.

Ўз навбатида, компаниянинг мамлакатимизда яшил водородни ривожлантиришдаги кўмаги юқори баҳоланиб, водород қурилмаларини қуриш лойиҳаларини республикамиз учун зарур ва истиқболли экани эътироф этилди.

Шунингдек, суҳбат чоғида атроф-муҳитни муҳофаза қилиш ҳамда яшил энергетикага оид  стратегик дастурларни жорий этишга қаратилган зарур меъёрий-ҳуқуқий ҳужжатларни қабул қилиш масалалари ҳам муҳокама қилинди.

Мулоқот сўнггида шундай ўзаро манфаатли ҳамкорлик узоқ муддат давом этиши ва истиқболда ҳам кенгайиб боришига ишонч билдирилди.