Тошкент, Ўзбекистон (UzDaily.uz) — Давлатимиз раҳбари топшириғига мувофиқ, “Ўзбекнефтгаз” АЖда етакчи хорижий компаниялар билан музокаралар олиб борилмоқда. Мулоқотларнинг асосий мақсади нефть ва газ лойиҳаларининг самарадорлигини ошириш, углеводородларни қазиб чиқариш ҳажмини кўпайтириш, замонавий бошқарув усулларини жорий этиш ва соҳа ривожини таъминлашда янги технологиялар, халқаро тажрибаларни жалб қилишдан иборат.

“Ўзбекнефтгаз” АЖ ва “Schlumberger”” компанияси раҳбарияти ўртасида бўлиб ўтган навбатдаги учрашувда ҳамкорликнинг бугунги натижалари кўриб чиқилди. Шунингдек алоқаларни янада ривожлантиришга қаратилган режалар белгилаб олинди.

Хусусан, томонлар Қўшма лойиҳаларни бошқарув жамоасини (Joint Project Management Team) ташкил этиш масаласини муҳокама қилдилар. Ушбу жамоанинг вазифаси Устюрт ҳудудидаги углеводород конларини ишлатишда янги бошқарув тизимини жорий этишни мувофиқлаштирдан иборат бўлади. Шу тариқа лойиҳанинг изчил ва самарали амалга оширилиши таъминланиб, ҳамкорлик икки томонлама узоқ муддатли шартномада қайд этилади.

Учрашувда белгиланган режалар ва эришилган келишувлар операцион самарадорликни ошириш ва инновацион ечимларни жорий этишга қаратилган қўшма лойиҳаларга янги имкониятлар эшигини очади.