Тошкент, Ўзбекистон (UzDaily.uz) — Saneg компанияси Андижон вилоятидаги «Хўжаобод» фотоэлектр станцияси (FES) қурилишининг биринчи босқичини якунлади. Лойиҳа компаниянинг қайта тикланадиган энергия манбаларини ривожлантириш стратегияси доирасида амалга оширилмоқда.

Биринчи босқичда станция қуввати 3 МВт (ДС) ни ташкил этади. Лойиҳа доирасида электр энергияси ишлаб чиқаришни таъминлайдиган 5 мингта қуёш панеллари, шунингдек, уни ўзгартириш ва тармоққа узатиш учун 20 та инвертор трансформатор подстанциялари ўрнатилди.

Ушбу босқичда кутилаётган йиллик электр энергияси ишлаб чиқариш ҳажми 6 миллион кВт/соатни ташкил этади. Олинган энергия компаниянинг ишлаб чиқариш объектлари ва вилоят инфратузилмасини таъминлаш учун ишлатилади.

«Хўжаобод» FESнинг биринчи босқичи ишга туширилиши энергетика лойиҳаларимизни ривожлантиришда муҳим босқич ҳисобланади. Ушбу иншоот қўшимча электр энергияси ишлаб чиқариш ва минтақада қуёш генерацияси салоҳиятини намойиш этиш имконини беради. Яқин вақт ичида FESнинг иккинчи босқичини ишга тушириш режалаштирилган, у станциянинг қувватини 5 МВт гача оширади", – деди Saneg бош директори Тўлқин Юсупов.