Тошкент, Ўзбекистон (UzDaily.uz) — Самарқандда энергетика соҳасида коррупцияга қарши курашишга бағишланган йиғилиш давомида электр ва газ таъминоти корхоналарининг етти нафар ходими залнинг ўзида қўлга олинди. Бу ҳақда Ўзбекистон Бош прокуратураси матбуот хизмати хабар берди.

Йиғилиш 14 февраль куни Бош прокурорнинг ўринбосари, ёқилғи-энергетика ресурсларидан фойдаланишни мувофиқлаштириш ва назорат қилиш бўйича Республика штаби раҳбари Шоҳруҳ Аминов бошчилигида ўтказилди. Унда аниқланган коррупция схемалари ва ноқонуний амалиётларни тўхтатиш чоралари муҳокама қилинди. Тадбирда «Ҳудудий электр тармоқлари» ва «Ҳудудгазтаъминот» компаниялари ҳамда уларнинг шаҳар ва туман филиаллари вакиллари иштирок этди.

Йиғилиш давомида энергетика корхоналарининг етти нафар ходими коррупция жиноятларида гумон қилиниб ҳибсга олинди. Уларга нисбатан қамоққа олиш тарзидаги эҳтиёт чораси қўлланилган бўлиб, ҳибс жараёни ҳамкасблари кўз ўнгида, қўлларига кишан тақилган ҳолда амалга оширилди.

Энергетика компаниялари раҳбарларига меҳнат интизомига риоя этилишини кучайтириш ва соҳада коррупция ҳолатларининг олдини олиш бўйича қатъий чоралар кўриш вазифаси юклатилди.