Самарқандда эркакнинг ошқозонидан 200 граммдан ортиқ мих ва саморез олиб ташланди

Тошкент, Ўзбекистон (UzDaily.uz) — 29 ёшли эркак қорин соҳасида кучли оғриқ билан Республика шошилинч тиббий ёрдам илмий марказининг Самарқанд филиалига ётқизилди, деб хабар берди муассаса матбуот хизмати.

Диагностика ва лаборатория текширувлари беморнинг ошқозон-ичак трактида кўп миқдордаги металл буюмлар - михлар ва саморез борлигини аниқлади.

Натижада шошилинч жарроҳлик амалиётини ўтказиш тўғрисида қарор қабул қилинди.

Беморга лапаротомия ва гастростомия қилинди. Қорин бўшлиғидан тахминан 200 грамм металл буюмлар олиб ташланди.

Марказнинг юқори тоифали шифокори Йўлдош Қулиевнинг сўзларига кўра, операция тахминан бир соат давом этган.

Дастлабки маълумотларга кўра, эркак кучли стресс остида бўлган ва ўз ҳаракатларини назорат қила олмаган ҳолда металл буюмларни ютиб юборган. Ҳозирда унинг аҳволи қониқарли ва у эркин ҳаракатлана олади.