Тошкент, Ўзбекистон (UzDaily.uz) — 2025 йил 1-2 июнь кунлари Самарқанд шаҳридаги “Silk Road Samarkand” халқаро туризм марказида Ўзбекистон ва Хитой ўртасидаги стратегик шерикликни мустаҳкамлаш, ҳудудлараро ҳамкорликни ривожлантириш ҳамда сармоя ва ишбилармонлик алоқаларини кенгайтиришга қаратилган иккинчи Ўзбекистон-Хитой ҳудудлараро форуми бўлиб ўтади.

Форумда 1500 дан ортиқ иштирокчи, жумладан, икки мамлакат ишбилармон доиралари, ҳукуматлар, вилоятлар ҳокимликлари, шунингдек, фан ва таълим муассасалари вакиллари иштирок этади.

Форум доирасида қатор келишувлар имзоланиши ва янги инвестиция лойиҳаларини ишга тушириш режалаштирилган. Форум Ўзбекистон ҳудудлари ва Хитой провинциялари ўртасидаги ҳар томонлама шерикликни мустаҳкамлашда муҳим қадам бўлиб, узоқ муддатли ҳамкорликка катта қизиқиш ва ишончни яна бир бор намоён этади.