Тошкент, Ўзбекистон (UzDaily.uz) — 29 май куни, Москвага икки кунлик ташриф доирасида Ўзбекистон Республикаси Президенти ёрдамчиси Саида Мирзиёева Россия Федерацияси Бош вазири Михаил Мишустин билан учрашув ўтказди.

Учрашув чоғида томонлар икки томонлама ҳамкорликнинг асосий йўналишлари — савдо, инвестициялар, меҳнат миграцияси ва малакали кадрлар тайёрлаш масалаларини муҳокама қилдилар.

Ўзбекистон ва Россия ўртасидаги товар айирбошлаш ҳажмининг ижобий ўсиши, шунингдек, саноат ва энергетика соҳаларидаги қўшма лойиҳаларни илгари суриш масалаларига алоҳида эътибор қаратилди. Томонлар миграция тартиб-таомилларини соддалаштириш чоралари, хусусан патент расмийлаштиришнинг айрим босқичларини Ўзбекистон ҳудудига кўчириш имконини кўриб чиқдилар.

Бундан ташқари, ҳудудлараро ҳамкорликни ривожлантириш ва таълим соҳасида янги ташаббусларни амалга ошириш, жумладан, Россия олий ўқув юртлари филиалларини очиш ва МИСиС қошида муҳандислик мактабини ташкил этиш масалалари ҳам муҳокама этилди.

Ташриф доирасида Саида Мирзиёева, шунингдек, Россия Президенти Маъмурияти раҳбари Антон Вайно, унинг биринчи ўринбосарлари Сергей Кириенко ва Алексей Громов, Россия Президенти ёрдамчиси Владимир Мединский, ҳамда Федерация Кенгаши раиси Валентина Матвиенко билан учрашувлар ўтказди.