Тошкент, Ўзбекистон (UzDaily.uz) — Россия томони таклифига биноан Ўзбекистон Республикаси Президентининг ёрдамчиси Саида Мирзиёева Москвада Россия Федерацияси Президенти Маъмурияти раҳбари Антон Вайно билан учрашув ўтказди. Томонлар Ўзбекистон-Россия стратегик шериклигининг ҳозирги ҳолати ва истиқболларини атрофлича муҳокама қилишди. Ушбу ҳамкорлик жадал ривожланмоқда ва сезиларли натижалар бермоқда.

Мулоқот давомида эришилган келишувларни мувофиқлаштириш ва амалга ошириш масалаларига алоҳида эътибор қаратилди. Президентлар даражасида белгиланган устувор вазифаларни самарали ҳал қилиш учун мониторинг механизмини шакллантириш муҳимлиги таъкидланди.

Савдо-иқтисодий ва инвестициявий соҳалардаги ҳамкорлик, инновацион лойиҳаларни йўлга қўйиш, ҳудудлараро алоқаларни кенгайтириш масалалари ҳам муҳокама қилинди.

Гуманитар йўналишдаги ҳамкорлик ва меҳнат миграцияси бўйича фикр алмашилди. Барча йўналишларда яқин ҳамкорлик ва мувофиқлашув зарурлиги қайд этилди.

Шу куни Саида Мирзиёева Россия Федерацияси Президенти Маъмурияти раҳбарининг биринчи ўринбосари Сергей Кириенко билан ҳам учрашув ўтказди. Суҳбат давомида ўзаро ишончга асосланган муносабатлар икки давлат раҳбарлари ўртасидаги мустаҳкам иттифоқ ва кўп қиррали ҳамкорлик пойдевори экани алоҳида таъкидланди.

Ёшлар ва кадрлар сиёсати масалаларига алоҳида эътибор қаратилди. Иккала томон ҳам иқтидорли ёшларни қўллаб-қувватлаш ва янги авлод малакали раҳбарларини тайёрлаш бўйича қўшма дастурлардан манфаатдор экани айтилди.

Таълим соҳасидаги ижобий тенденциялар қайд этилди: россиялик олий ўқув юртларида таҳсил олаётган ўзбекистонлик талабалар сони ортиб бормоқда, Ўзбекистонда эса етакчи рус университетларининг филиаллари муваффақиятли фаолият юритмоқда.

Шунингдек, Россия Президенти Маъмурияти раҳбарининг биринчи ўринбосари Алексей Громов билан учрашув бўлиб ўтди. Асосий мавзулардан бири — ахборот соҳасидаги ҳамкорлик бўлди. Глобал медиа маконининг тез ўзгариб бораётган шароитида холис, барқарор ва масъул ахборот муҳитини шакллантириш муҳимлиги таъкидланди.

Ахборот хавфсизлиги, ёлғон маълумотларнинг тарқалишига қарши курашиш ва журналистиканинг касбий стандартларини тарғиб қилиш бўйича ҳамкорлик масалалари муҳокама қилинди. Бу йўналишда Тошкентда амалий маслаҳатлар ўтказишга тайёрлик билдирилди.

Меҳнат миграциясини ёритиш ва маданий дипломатияни ривожлантириш масалаларига ҳам эътибор қаратилди. Ахборот сиёсатида масъул ва теран ёндашув зарурлиги, гуманитар ташаббусларни кенгайтириш эса икки халқ ўртасидаги ишонч ва англашувни мустаҳкамлаш воситаси сифатида қайд этилди.