Россия элчихонаси делегацияси Чирчиқ технопаркининг инвестиция салоҳияти билан танишди

Тошкент, Ўзбекистон (UzDaily.uz) — «Чирчиқ» технопаркига Россия Федерациясининг Фавқулодда ва Мухтор Элчиси Ерхов Алексей Владимирович ва Россия Федерациясининг Ўзбекистон Республикасидаги Савдо ваколатхонаси вакили Злигостев Константин Николаевич бошчилигидаги Россия Федерацияси Ўзбекистон Республикасидаги элчихонаси делегацияси ташриф буюрди.

Бугунги кунда «Ўзкимёсаноат» АЖ ва «Химград» технополиси (Татаристон Республикаси) ҳамкорлиги доирасида ташкил этилган «Чирчиқ» ва «Жиззах» технопарклари Ўзбекистон Республикаси ва Россия Федерацияси ўртасидаги икки томонлама ҳамкорликнинг ёрқин намунаси ҳамда Россия Федерацияси инвесторларининг лойиҳалари муваффақиятли амалга оширилаётган майдон ҳисобланади.

«Чирчиқ» технопаркига ташриф давомида Россия Федерациясининг Ўзбекистон Республикасидаги Фавқулодда ва Мухтор Элчиси - Ерхов Алексей Владимирович ва Россия Федерациясининг Ўзбекистон Республикасидаги Савдо ваколатхонаси вакили Злигостев Константин Николаевич, шунингдек, Россия Федерацияси элчихонаси ходимларига технопаркларнинг инвестициявий имкониятлари, қўлланилаётган солиқ ва божхона имтиёзлари, саноат инфратузилмаси тўғрисида батафсил маълумот берилди.

Меҳмонлар Россия Федерацияси ва бошқа мамлакатлар инвестициялари иштирокидаги «Чирчиқ» технопаркининг резидент корхоналарининг ишлаб чиқариш майдонларида бўлиб, технологик жиҳозланиш даражаси ва ишлаб чиқарилаётган маҳсулотлар кўламини шахсан баҳолашга муваффақ бўлдилар.

Ушбу ташриф Россия Федерацияси ва Ўзбекистон Республикаси ўртасидаги икки томонлама савдо-иқтисодий ва сармоявий ҳамкорликни мустаҳкамлашга салмоқли ҳисса қўшади, қўшма лойиҳаларни амалга ошириш учун янги истиқболли йўналишларни кашф этади.