«Росатом»: Ўзбекистонда кичик қувватли АЭС бўйича лойиҳа ҳужжатлари 2025 йил охиригача тайёр бўлади

Тошкент, Ўзбекистон (UzDaily.uz) — Россиянинг давлат корпорацияси «Росатом» 2025 йил охиригача Ўзбекистонда қурилаётган кичик қувватли атом электростанцияси (АЭСММ) учун лойиҳа ҳужжатларини ишлаб чиқишни якунлаб, уни буюртмачи томонга тақдим этади. Бу ҳақда корпорация матбуот хизмати хабар берди.

Ҳозирда Жиззах вилоятидаги бўлажак станция майдонида инженерлик тадқиқотлари олиб борилмоқда, шунингдек, қурилиш-монтаж базаси яратилмоқда.

«Росатом» маълумотига кўра, лойиҳа ҳужжатлари 2025 йил охиригача тайёрланиб, ўзбек томонига топширилади.

Пайшанба куни бўлажак кичик қувватли АЭС майдонида қурилиш ишларининг бошланишига бағишланган тантанали маросим бўлиб ўтди — техника илк куб метр тупроқни олиб ташлади.

«Бугун Ўзбекистонда атом генерациясини яратиш бўйича лойиҳа амалга оширилишида янги босқич бошланмоқда. “Росатом”нинг барча хорижий лойиҳаларида бўлгани каби, кичик қувватли станция қурилишида ҳам маҳаллийлаштириш даражаси юқори бўлади. Ишларни ўзбек субпудрат ташкилотлари амалга оширмоқда. “Росатом” камида 60 йил хизмат қилиш муддатига эга станцияни барпо этади ва унинг фаолияти жараёнида ҳар томонлама қўллаб-қувватлайди. Бизни ўзаро фойдали ва самарали ҳамкорликнинг узоқ йиллари кутмоқда», — деди давлат корпорацияси бош директори Алексей Лихачёв.

Ўзбекистондаги биринчи атом электростанциясини қуриш бўйича шартнома 2024 йил 27 май куни имзоланган эди. Лойиҳа доирасида Жиззах туманида ҳар бири 55 мегаватт қувватга эга олти реактордан иборат кичик қувватли АЭС барпо этилиши кўзда тутилган.

Лойиҳанинг бош пудратчиси сифатида «Росатом»нинг инжиниринг дивизиони таркибига кирувчи «Атомстройэкспорт» АЖ фаолият юритмоқда. Шунингдек, лойиҳани амалга оширишга маҳаллий компаниялар, жумладан Enter Engineering ҳам жалб этилган.

Россия Иқтисодий ривожланиш вазирлиги маълум қилишича, 2025 йилда Ўзбекистон ва Россия президентлари атом энергетикаси соҳасидаги ҳамкорликни кенгайтириш ҳамда мамлакатда икки блокли йирик қувватли АЭС ва икки блокли кичик қувватли станция қуриш бўйича келишувга эришган.