Тошкент, Ўзбекистон (UzDaily.uz) — Ўзбекистон Республикаси Бош вазири ўринбосари – Иқтисодиёт ва молия вазири Жамшид Қўчқоров жорий йилнинг 16–17 февраль кунлари Саудия Арабистонининг Ал-Ула шаҳрида ўтказилаётган Ривожланаётган мамлакатлар мулоқоти конференсиясида иштирок этмоқда. Ушбу нуфузли тадбир доирасида Халқаро валюта жамғармаси (ХВЖ) бош директори Кристалина Георгиева билан учрашув бўлиб ўтди.

Учрашув давомида Ўзбекистон ва ХВЖ ўртасидаги фаол ҳамкорликнинг бугунги ҳолати ҳамда келгусидаги режалар муҳокама қилинди. Таъкидланганидек, 2017–2024 йиллар давомида ХВЖ билан ҳамкорликда Ўзбекистондаги иқтисодий ислоҳотларни қўллаб-қувватлаш мақсадида 90 дан ортиқ техник кўмак лойиҳалари, маслаҳат ва молиявий ёрдам дастурлари амалга оширди.

Учрашувда 2024 йил ноябр ойида Ўзбекистонда ишга туширилган Молиявий секторни баҳолаш дастури (FSAP) муҳокама қилинди. ХВЖ ва Жаҳон банки ҳамкорлигида амалга оширилаётган ушбу дастур мамлакат молия тизимининг барқарорлиги ва ривожланиш эҳтиёжларини чуқур таҳлил қилишга қаратилган. FSAP натижалари асосида молия тизимини янада мустаҳкамлаш бўйича тегишли тавсиялар ишлаб чиқилиши ва уларни амалга оширишда ХВЖнинг кўмаги давом этиши таъкидланди.

Музокаралар давомида давлат молиясини бошқариш тизимидаги шаффофлик ва ҳисобдорлик масалалари ҳам муҳокама қилинди. Ўзбекистон сўнгги йилларда 2020–2024 йилларга мўлжалланган Давлат молиясини бошқариш стратегияси доирасида кенг кўламли ислоҳотларни амалга оширди. Шу муносабат билан, 2019 йилда ўтказилган Фискал шаффофликни баҳолаш (FTE) натижаларини янгилаш ва сўнгги ислоҳотларнинг самарадорлигини баҳолаш мақсадга мувофиқ экани айтиб ўтилди.

Мулоқот чоғида Ўзбекистон ва ХВЖ ўртасидаги ҳамкорликни кенгайтириш масалалари доирасида 2025-йилда Самарқанд шаҳрида ўтказилиши режалаштирилаётган GCC+CA (Форс кўрфази ҳамда Кавказ ва Марказий Осиё давлатлари) Молия вазирлари ва Марказий банк раҳбарлари конференсияси юзасидан фикр алмашилди.

Бош вазир ўринбосари – Иқтисодиёт ва молия вазири Жамшид Қўчқоров Кристалина Георгиевани ушбу нуфузли тадбирга ташриф буюришга таклиф этди ва ХВЖ раҳбарияти билан яқин ҳамкорликда ишлашда давом этишга тайёрлигини билдирди.