Республика меҳмонхоналари Рамазон ойида саҳарлик ўтказиш учун шароит яратди

Тошкент, Ўзбекистон (UzDaily.uz) — Муқаддас Рамазон ойи муносабати билан жорий йилнинг 19 февралдан 20 мартга қадар республика бўйлаб 551 та меҳмонхонада меҳмонлар учун саҳарлик ўтказиш ташкил этилди.

Ушбу ташаббус Рамазон даврида қулай маънавий муҳит яратишга, шунингдек меҳмондўстлик соҳасида хизмат кўрсатиш даражаси ва сифатини оширишга қаратилган.

Рўза тутаётган меҳмонлар учун яшаш давомида қулай ва муносиб шароитларни таъминлашга алоҳида эътибор қаратилмоқда.

Саҳарлик менюси миллий таомлар анъаналари, ҳалол овқатланиш талаблари ва соғлом рацион тамойилларини инобатга олган ҳолда шакллантирилмоқда. Меҳмонхоналарда рўза тутаётган меҳмонларга ўз вақтида ва сифатли хизмат кўрсатиш учун барча зарур ташкилий шароитлар яратилган.