Рақобат қўмитаси IMEI рўйхатдан ўтказиш қоидаларини тушунтирди

Тошкент, Ўзбекистон (UzDaily.uz) — Ўзбекистон Республикаси Рақобат қўмитаси мобил қурилмаларнинг IMEI-кодларини рўйхатдан ўтказиш тартиби ва тадбиркорлар масъулияти юзасидан тушунтириш берди.

Тушунтиришларга фуқароларнинг қурилмаларни харид қилгандан сўнг IMEI-кодлар рўйхатдан ўтказилмагани ва уларни қайта рўйхатдан ўтказиш зарурати билан боғлиқ мурожаатлари сабаб бўлди. Вазирликлар, идоралар ва тизим операторлари мазкур ҳолатни ўрганишга жалб этилди.

Қўмита маълумотига кўра, 2025 йилда ушбу масала бўйича 147 та мурожаат келиб тушган. Уларнинг 55 таси ижобий ҳал этилган, 89 таси бўйича ҳуқуқий тушунтиришлар берилган, яна 3 таси ваколатли органларга юборилган.

Истеъмолчилар ҳуқуқларини ҳимоя қилиш тўғрисидаги қонунчиликка мувофиқ, ишлаб чиқарувчи, импорт қилувчи ёки сотувчи товар ҳақида ишончли маълумот тақдим этиши ва кафолат муддати давомида унинг тўғри ишлашини таъминлаши шарт.

Вазирлар Маҳкамасининг 778-сон қарорига мувофиқ, IMEI-кодларни рўйхатдан ўтказиш бўйича жавобгарлик тадбиркорлик субъектлари зиммасига юкланган. Барча IMEI-кодларни рўйхатдан ўтказиш мажбурияти ишлаб чиқарувчи, импорт қилувчи ёки сотувчига тегишли.

Қўмита таъкидлашича, харидор IMEI-кодни мустақил равишда рўйхатдан ўтказиши шарт эмас. Чакана савдода сотувчи аллақачон рўйхатдан ўтган қурилмаларни сотиши лозим ва қўшимча хизматларни мажбурий тарзда таклиф қилишга ҳақли эмас.

Ушбу талаблар бузилган тақдирда тадбиркорларга нисбатан белгиланган тартибда таъсир чоралари қўлланилади.