Raiffeisen Bank Ўзбекистон капитал бозорининг «Тартибга солиш қумдони» тизимига қўшилди

Тошкент, Ўзбекистон (UzDaily.uz) — Raiffeisen Bank International AG Ўзбекистон капитал бозоридаги махсус ҳуқуқий режимга қўшилди, деб хабар берди Миллий истиқболли лойиҳалар агентлиги (ИМЛА) матбуот хизмати.

Банк ИМЛА томонидан капитал бозори соҳасидаги «Тартибга солиш қумдони» ташаббусининг иштирокчиси сифатида рўйхатдан ўтказилди. Австрия банки ушбу ташаббусга қўшилган олтинчи иштирокчи бўлди.

Маълум қилинишича, Raiffeisen Bank хорижий номинал сақловчи сифатида фаолият юритади ва мижозларга Ўзбекистон Республика валюта биржаси ҳамда «Тошкент» Республика фонд биржаси орқали сотиб олинган ўзбек қимматли қоғозларини сақлаш ва улар бўйича ҳисоб-китобларни амалга ошириш имкониятини тақдим этади.