Қувайт компанияси Тошкентда инъекцион ва онкологик препаратлар ишлаб чиқаришни режалаштирмоқда

Тошкент, Ўзбекистон (UzDaily.uz) — 2026 йил 13 январь куни Фармацевтика тармоғини ривожлантириш агентлиги директори Абдулла Азизов ҳамда Қувайтнинг «Burgan International» компанияси вакиллари билан учрашув бўлиб ўтди.

«Burgan International» компанияси 1993 йилда ташкил этилган бўлиб, нефть, энергетика ва инфратузилма лойиҳалари соҳасида фаолият юритувчи халқаро пудратчи ва ишлаб чиқарувчи компания ҳисобланади. Компаниянинг жами активлари 8 млрд АҚШ долларини ташкил этади.

Учрашув давомида компания томонидан «Tаshkent Pharma Park» фармацевтика кластери ҳудудида инъекцион ҳамда онкология йўналишидаги дори воситаларини ишлаб чиқаришга ихтисослашган йирик қувватдаги ишлаб чиқариш корхонасини ташкил этиш таклифи билдирилди. Лойиҳани амалга ошириш бўйича белгиланган босқичлар юзасидан маълумот берилди.

Инвестицион салоҳият тақдимоти доирасида агентлик директори Ўзбекистондаги амалдаги қонунчилик, солиқ имтиёзлари ҳамда «Tаshkent Pharma Park» кластери ҳудудида яратилган имкониятлар билан таништириб, режалаштирилаётган лойиҳа компания учун МДҲ давлатлари бозорига чиқиш имкониятини яратишини ҳамда унинг стратегик аҳамиятини таъкидлади.

Учрашув якунида томонлар ҳамкорликни ривожлантиришга ва агентлик ҳар томонлама кўмак кўрсатишга тайёр эканини билдириб, музокараларни давом эттириш бўйича келишувга эришилди.