Тошкент, Ўзбекистон (UzDaily.uz) — Қозоғистоннинг Мангистау вилоятида ис газидан заҳарланиш оқибатида ҳалок бўлганлар орасида фақат оила бошлиғи Ўзбекистон фуқароси бўлгани маълум қилинди, деб ёзади Kun.uz.

Фавқулодда вазиятлар вазирлиги Қозоғистонда содир бўлган мазкур фожиада бир нафар Ўзбекистон фуқароси жабрланганини тасдиқлади.

Ҳодиса 2 март куни Баскудуқ қишлоғидаги хусусий уйда содир бўлган. Оқибатда етти киши, жумладан, беш нафар вояга етмаган бола ҳалок бўлди. Илк маълумотларга кўра, фожианинг сабаби газ ускуналаридан нотўғри фойдаланиш бўлган.

Ҳалок бўлганларнинг барчаси бир оила аъзолари экани маълум қилинди. Ўзбекистон фуқароси Қозоғистон фуқароси билан турмуш қурган бўлиб, мамлакатда яшаш учун рухсатнома асосида истиқомат қилган. Оилада беш нафар фарзанд тарбияланаётган эди ва улар ҳам заҳарланиш оқибатида ҳаётдан кўз юмди.

Ҳозирда ваколатли органлар воқеа тафсилотларини ўрганиш бўйича тергов ҳаракатларини олиб бормоқда.