Тошкент, Ўзбекистон (UzDaily.uz) — Қозоғистон ва Ўзбекистон ўртасидаги товар айирбошлаш ҳажмини ошириш мақсадида ўзбек томони қўшимча тўртта савдо йўлагини ишга туширишни режалаштирмоқда. Бу ҳақда Kazinform агентлиги хабар бермоқда.

Ушбу ташаббусни Ўзбекистон Республикасининг Қозоғистондаги Фавқулодда ва Мухтор Элчиси Бахтиёр Ибрагимов Жетису вилояти тадбиркорлари билан учрашув чоғида маълум қилди.

Дипломат Ўзбекистон томонидан икки давлат ўртасидаги иқтисодий ҳамкорликни мустаҳкамлаш бўйича кўрилаётган чора-тадбирлар ҳақида батафсил маълумот берди. Хусусан, Тошкент расмийлари чегарадаги назорат-ўтказиш пунктларини кенг кўламли реконструкция қилиш ишларини олиб бораётганини таъкидлади. Унинг сўзларига кўра, бу чоралар ўзаро савдо ҳажмининг ўсишига тўғридан-тўғри таъсир кўрсатади.

Бундан аввал, Тошкентда Қозоғистон савдо маркази, Остонада эса Ўзбекистон савдо маркази очилиши мумкинлиги ҳақида хабар берилган эди.

Айни пайтда Ўзбекистонда қозоқ капитали иштирокида 1000 дан ортиқ корхона муваффақиятли фаолият юритмоқда, шу билан бирга, икки давлат ўртасидаги ҳудудлараро алоқалар ҳам жадал ривожланиб бормоқда.

Ўтган йил якунига кўра, Қозоғистон ва Ўзбекистон ўртасидаги товар айирбошлаш ҳажми 4,2 миллиард АҚШ долларидан ошди. Хусусан, Ўзбекистон Қозоғистонга 1,4 миллиард долларлик товар экспорт қилган, импорт эса 2,8 миллиард доллардан зиёдни ташкил этган.

Шунингдек, сўнгги беш ой ичида Қозоғистон Ўзбекистонга 2 миллион тонна дон маҳсулотлари етказиб берган.