Қозоғистон Ўзбекистон билан 70 миллион долларлик экспорт шартномаларини имзолади

Тошкент, Ўзбекистон (UzDaily.uz) — Қозоғистон ва Ўзбекистон вакиллари Тошкентда бўлиб ўтган савдо-иқтисодий миссия доирасида жами 70 миллион АҚШ долларидан зиёд миқдордаги янги экспорт шартномаларини имзоладилар.

Шартномалар икки мамлакат вазирликлари ва бизнес доиралари вакиллари иштирокида имзоланди.

Тадбирда қишлоқ хўжалиги, саноат, логистика ва хизмат кўрсатиш соҳаларида фаолият юритаётган ўнлаб компаниялар иштирок этди.

Қозоғистон савдо вазири ўринбосари Айдар Абилдабеков таъкидлашича, бундай миссиялар компанияларга ўз маҳсулотларини тақдим этиш билан бирга, қўшни мамлакат бозорига тўғридан-тўғри чиқиш имконини ҳам беради.

«Тошкентдаги миссия — бу компаниялар учун фақат маҳсулотни намойиш этиш эмас, балки қўшни давлат бозорига чиқиб, етказиб бериш бўйича келишувларга эришиш ва экспортни бошлаш имкониятидир», — деди у.

Қозоғистон Савдо вазирлиги маълумотларига кўра, янги келишувлар икки мамлакат ўртасидаги савдо-иқтисодий ҳамкорликни ривожлантириш ва қўшма лойиҳаларни амалга ошириш учун қўшимча туртки бўлади.

2025 йил бошидан бери Қозоғистон ва Ўзбекистон ўртасидаги ўзаро товар айирбошлаш ҳажми 18,5 фоизга ўсиб, 3 миллиард АҚШ долларига етди.