Қорақалпоғистонда совуқ тушиши сабабли газ тўлдириш станцияларининг фаолияти вақтинча чекланди

Тошкент, Ўзбекистон (UzDaily.uz) — Қорақалпоғистон Республикасида автомобиль газ тўлдириш компрессор станцияларининг фаолиятига вақтинча чекловлар жорий этилди.

«Ҳудудгаз Қорақалпоғистон» филиали маълум қилишича, ушбу қарор кескин совуқ тушиши оқибатида магистрал газ қувурларида босим пасайгани билан боғлиқ.

Газ тақчиллиги шароитида аввало аҳоли хонадонлари ва ижтимоий объектларни газ билан таъминлашга устувор аҳамият берилади.

Метан қуйиш шохобчалари учун жорий этилган чекловлар вазият барқарорлашгунга қадар амал қилади. Кутилишича, ҳолат 3–4 кун ичида, тахминан 1–2 март кунларига қадар меъёрга келади.

Кейинроқ Ўзбекистон Энергетика вазирлиги магистрал газ қувурларидаги босим барқарор эканини маълум қилди ва метан автозаправка станциялари барча ҳудудларда, шу жумладан Қорақалпоғистон Республикасида ҳам, одатий тартибда ишлаётганини қайд этди.