Тошкент, Ўзбекистон (UzDaily.uz) — Қорақалпоғистон Республикаси Жўқарғи Кенеси раиси Аманбай Орынбаев бошчилигидаги делегациянинг Бирлашган Араб Амирликларига амалга оширган ишчи ташрифи доирасида, Ўзбекистоннинг Мисрдаги элчихонаси ташаббуси билан, мисрлик тадбиркор — Bell Energy компанияси раиси Ҳайсам Ҳусейн билан учрашув бўлиб ўтди. Бу ҳақда ИА «Дунё» хабар берди.

Ҳамкорлик руҳида ўтган музокаралар чоғида томонлар Қорақалпоғистоннинг инвестиция салоҳияти, иқтисодий кўрсаткичлари ва халқаро лойиҳаларни амалга ошириш имкониятлари ҳақида фикр алмашдилар. Хусусан, Bell Energy компаниясининг минтақадаги лойиҳаларда иштирок этишига алоҳида эътибор қаратилди.

Музокаралар якунларида Қорақалпоғистон Республикаси Вазирлар Кенгаши, Bell Energy компанияси ва унинг бизнес ҳамкорлари ўртасида умумий қиймати 660 миллион долларга тенг бўлган 5 та ўзаро англашув меморандуми имзоланди.

Имзоланган ҳужжатларга мувофиқ қуйидаги йирик лойиҳаларни амалга ошириш кўзда тутилган:

нефт маҳсулотлари учун ер ости омборлари қуриш,

"Қайрақтас" олтин кон майдонини ўзлаштириш,

чиқиндилардан энергия ишлаб чиқариш,

биоэтанол ва авиаёқилғи ишлаб чиқариш учун бамбук плантациялари ташкил этиш,

болалар фаровонлигини оширишга қаратилган ижтимоий лойиҳа.

Томонлар ҳар бир лойиҳанинг техник ва молиявий жиҳатларини келишиб олиш бўйича ишлар давом эттирилишига келишиб олдилар.