Тошкент, Ўзбекистон (UzDaily.uz) — Юртимизда жорий йилги мева-сабзавот етиштириш мавсумининг илк ҳосиллари йиғиб олинмоқда. Хусусан, Қашқадарё вилоятида тарвуз терими ва уни экспорт қилиш ишлари жадал суръатларда олиб борилмоқда. Бу йилги илк ҳосилданоқ ушбу полиз маҳсулотига ташқи бозорларда катта талаб мавжуд экани яққол сезилмоқда.

Маълумотларга кўра, ҳозирга қадар жами 3 минг тонна тарвуз хорижга экспорт қилинган. Шу билан бирга, пишиб етилган ҳосил ички бозорга ҳам изчил етказиб берилмоқда. Бу борада, албатта, қашқадарёлик, хусусан, Кўкдала туманининг фермер ва деҳқонларининг меҳнати беқиёсдир.

Қашқадарё тарвузи ўзининг ширинлиги, табиий таркиби ва эртапишарлиги билан ички ва ташқи бозорларда юқори талабга эга. Экспорт ҳажмининг ортишида маҳсулотни тез ва сифатли саралаш, қадоқлаш, логистика ва экспортга йўналтириш бўйича йўлга қўйилган тизимли ишларнинг роли катта.

Айни пайтда тарвуз асосан Қозоғистон, Россия, Қирғизистон ва Бирлашган Араб Амирликлари каби давлатларга экспорт қилинмоқда. Тарвузнинг эрта пишиб етилиши эса ушбу бозорлардаги рақобатбардошликни сезиларли даражада оширмоқда.

Аграр соҳада экспорт салоҳиятини ошириш мақсадида Қишлоқ хўжалиги вазирлиги, Инвестициялар, саноат ва савдо вазирлиги ҳамда маҳаллий ҳокимликлар томонидан тадбиркорларга логистика, ветеринария ва фитосанитария текширувларидан ўтказиш, экспорт ҳужжатларини расмийлаштиришда кўмаклашиш ишлари тизимли йўлга қўйилган.

2024 йилда тарвуз етиштириш бўйича экспортбоп навларни кўпайтириш, ерлардан самарали фойдаланиш, замонавий агротехнологияларни кенг жорий этиш орқали экспорт ҳажмини ошириш режалаштирилган эди. Қашқадарёда бу борада олиб борилаётган ишлар юқори самара бераётгани амалий натижаларда яққол кўзга ташланмоқда.