Тошкент, Ўзбекистон (UzDaily.uz) — Қашқадарё вилоятининг Нишон туманида қуввати 500 МВт бўлган қуёш фотоэлектр станциясининг қурилиши якунланди.

Лойиҳа Хитойнинг China Energy Engineering Corporation (CEEC) компанияси иштирокида амалга оширилиб, унга 336 миллион АҚШ доллари сарфланган. Лойиҳа уч босқичда амалга оширилди. 2023 йил декабрь ойида тугалланган биринчи босқичда 1 минг гектардан ортиқ майдонда 200 МВт қувват ишга туширилди. 2025 йилда станция тўлиқ 500 МВт қувватга эришди.

CEECнинг қурилиш ва монтаж ишлари бўйича директор ўринбосари Хуанг Сен Лин таъкидлашича, компания Бухоро, Фарғона, Андижон ва Қашқадарё вилоятларида амалга оширилаётган 13 лойиҳада иштирок этмоқда.

«Ўзбекистонда қулай бизнес муҳити яратилгани ва зарур шарт-шароитлар таъминлангани туфайли уч босқичли лойиҳани қисқа муддатларда якунлашга эришдик», — деди у.

Унинг сўзларига кўра, мазкур лойиҳа энг йириклардан бири бўлиб, энергия манбаларга бўлган ўсиб бораётган талабни қондиришга хизмат қилади. «500 МВт қувватли бу электр станцияси бозорни барқарорлаштиришга ёрдам беради. Келгусида компаниямиз Ўзбекистон ҳудудида бошқа йирик лойиҳаларда иштирок этишни режалаштирмоқда», — дея қўшимча қилди CEEC вакили.

Қурилиш учун қуввати 540 дан 570 Вт гача бўлган 1 миллиондан зиёд қуёш панеллари, 57 инвертор ва 57 мингдан ортиқ металл маҳсулотлар олиб келинган. Шунингдек, қуввати 220 кВт бўлган подстанция, икки трансформатор ва маъмурий бинолар қурилди.

Панелларнинг ўзига хослиги — қуёш ҳаракатига автоматик равишда мослашиш қобилиятидир. Электр энергияси ишлаб чиқариш тугаганидан сўнг, тахминан соат олтиларда, панелларни автоматик тозалаш жараёни бошланади.

Айни пайтда, фотоэлектр станцияси Ўзбекистон миллий электр тармоқларига 926 миллион кВт·соат электр энергиясини узатган.