Тошкент, Ўзбекистон (UzDaily.uz) — Қашқадарё вилояти делегацияси 17–22 февраль кунлари амалий сафар билан Германияда бўлди, деб хабар қилмоқда «Дунё» АА мухбири.

Сафар таълим, соғлиқни сақлаш, миграция ва бошқа соҳаларда ҳудудлараро ҳамкорликни йўлга қўйиш мақсадида амалга оширилди.

Ташриф доирасида Германиянинг "Ernst Klett AG", "Günter Papenburg AG", "SIT International GmbH", "Dr. Holldorf Consult GmbH", "GFM Group" ва "Avestos GmbH" каби етакчи компаниялари билан муҳим учрашувлар ўтказилди.

Музокараларда касбий таълим, меҳнат миграцияси соҳаларида ҳамкорликни йўлга қўйиш, ёшларни мазкур компаниялар корхоналарида дуал таълим йўналишларида ўқитиш, қолаверса, ёш битирувчиларни пайвандчилик, электромонтаж ва қурилиш каби немис меҳнат бозорида талаб юқори бўлган касбларда иш билан таъминлаш масалалари муҳокама қилинди.

Таълим соҳасида алоқаларни кенгайтириш, хусусан, Қарши шаҳрида замонавий болалар боғчаси қуриш ва ўзбек-немис қўшма мактаби ташкил қилишга келишилди.

Бундан ташқари, соғлиқни сақлаш соҳаси вакиллари ўртасида тажриба алмашишни кучайтириш ва Қашқадарё вилоятидаги шифохоналарга Германия стандартларини жорий қилиш, маданий алмашинувларни ривожлантириш, немис тили курслари ва қўшма тадбирлар ўтказиш ўзаро суҳбатларнинг асосий мавзуси бўлди.

Амалий сафар давомида делегация аъзолари ўқув марказлари ва тиббиёт клиникаларида бўлдилар ва ўқув жараёни ҳамда яратилган шароитлар билан танишдилар.

Хулоса ўрнида таъкидлаш керакки, Қашқадарё вилояти делегацияси сафарида давомида бўлиб ўтган учрашувлар Германия Ўзбекистон яқин ҳамкорликка тайёрлигини яна бир бор кўрсатди. Эришилган келишувлар эса вилоят ижтимоий-иқтисодий ҳаётини юксалтиришда муҳим қадам бўлиб, янги болалар боғчаларидан тортиб иш ўринларигача бўлган ташаббуслар кенг кўламли ривожланиш имкониятларини очиб беради.