Тошкент, Ўзбекистон (UzDaily.uz) — Россия ва Ўзбекистон миграция масалаларини ҳал этиш бўйича ягона тизимни шакллантириш, жумладан, Россия Федерациясида меҳнат фаолиятини амалга оширишни режалаштираётган мутахассисларни олдиндан тайёрлаш юзасидан келишувга эришди. Бу ҳақда Россия Президенти Владимир Путин ТАСС агентлиги томонидан уюштирилган дунёнинг етакчи ахборот агентликлари раҳбарлари билан учрашув чоғида маълум қилди.

«Биз бугун ижтимоий сиёсат ва меҳнат бозоридаги вазият қанчалик долзарб эканини яхши тушунамиз. [Ўзбекистон президенти] Шавкат Миромонович [Мирзиёев] билан биз аниқ келишувга эришдик — миграция масалаларини биргаликда ҳал этамиз. Россиянинг меҳнат бозорида маълум бир кадр танқислиги мавжуд, Ўзбекистонда эса ижтимоий босим кузатиляпти ва биз бу борада умумий ечимга келдик. Россияда ишлашни хоҳловчи шахсларни олдиндан тайёрлаш жуда муҳим,» — дея таъкидлади Россия раҳбари.

Путиннинг сўзларига кўра, бу жараёнда ёшларга алоҳида эътибор қаратилади, чунки икки мамлакат ёш авлодлари ўртасидаги ҳамкорлик катта аҳамият касб этмоқда ва бу, ўз навбатида, икки томонлама шерикликни янада чуқурлаштиришга хизмат қилади.