Тошкент, Ўзбекистон (UzDaily.uz) — Тошкент метрополитенининг янги йўналиши — «Пушкин» станциясидан ТТЗ ҳудудигача бўлган метро тармоғи 2025 йил 15 июндан қурила бошлайди. Бу ҳақда Ўзбекистон Республикаси транспорт вазири Илҳом Маҳкамов «O’zbekiston 24» телеканалига берган интервьюсида маълум қилди.

2024 йил 19 май куни Президент Шавкат Мирзиёев Тошкент метрополитени ривожланишига бағишланган тақдимот билан танишди. Лойиҳа икки босқичда амалга оширилиши кўзда тутилган.

Бундан аввалги март ойида ўтказилган тақдимот чоғида давлат раҳбари аниқ топшириқлар берган ва шу асосда ҳукумат томонидан янада такомиллаштирилган лойиҳа ишлаб чиқилди. Унда молиялаш манбалари ва амалга ошириш муддатлари атрофлича кўрсатилган.

Транспорт вазири таъкидлашича, аввалроқ Чилонзор линияси «Буюк Ипак йўли» станциясидан ТТЗгача узайтирилиши режалаштирилган эди. Бироқ кунлик 140 минг нафардан ортиқ киши Чирчиқ, Қибрай ва Ғазалкентдан пойтахтга қатнаши «Буюк Ипак йўли» атрофида жиддий тирбандликлар келтириб чиқараётганини инобатга олиб, янги линияни «Пушкин» (ёки «Салар») станциясидан бошлаш мақсадга мувофиқ, деб топилди.

Илҳом Маҳкамовнинг сўзларига кўра, қурилишни 2025 йил 15 июндан бошлаш топширилган. Лойиҳага халқаро тажрибага эга пудратчи ташкилотлар жалб этилади. Янги линия қурилиши 2026 йил охиригача якунланиши режалаштирилган.

Шунингдек, транспорт вазири Президентнинг топшириғига асосан, «Дўстлик» станциясидан «Янги Тошкент» ҳудудигача бўлган яна бир метро йўли лойиҳалаш ва қуриш ишларини бошлаш бўйича ҳам иш олиб борилаётганини маълум қилди.