Тошкент, Ўзбекистон (UzDaily.uz) — Чехия Республикаси пойтахти Прага шаҳрида Ўзбекистон-Чехия савдо-иқтисодий ва сармоявий ҳамкорликни ривожлантириш доирасида қатор тадбирлар бўлиб ўтди.

Хусусан, Ўзбекистон ва Чехия ўртасида савдо-иқтисодий ва илмий-техникавий ҳамкорлик бўйича ҳукуматлараро комиссиянинг 10-йиғилиши, чех бизнес вакиллари иштирокида давра суҳбати ҳамда Чехиянинг етакчи компаниялари раҳбарлари билан қатор икки томонлама учрашувлар бўлиб ўтди. Чехия Республикаси саноат ва савдо вазирлиги раҳбарияти билан ҳам музокаралар олиб борилди.

Икки мамлакат делегацияларига Ўзбекистон Республикаси Инвестициялар, саноат ва савдо вазири ўринбосари Акрам Алиев ҳамда Чехия Республикаси саноат ва савдо вазири ўринбосари Мартин Фрелих раҳбарлик қилди.

Савдо-иқтисодий ва илмий-техникавий ҳамкорлик бўйича ҳукуматлараро комиссия йиғилишида тегишли вазирликлар, идоралар ва амалдаги келишувлар ижроси учун масъул бўлган тармоқ бирлашмалари раҳбарларининг маърузалари тингланди.

Лойиҳаларнинг ҳар бир босқичи атрофлича таҳлил қилиниб, уларни муваффақиятли амалга оширишни жадаллаштириш бўйича самарали ечимлар ишлаб чиқилиб, муддатлар ҳамда масъул шахслар белгилаб олинди.

Томонлар, шунингдек, икки мамлакат ўртасидаги муносабатларнинг бугунги ҳолати ва уларни ривожлантириш истиқболларини кўриб чиқдилар, ўзаро савдо кўрсаткичлари, сармояларни жалб этиш ва саноат кооперацияси бўйича мақсадли мезонларни белгилаб олдилар.

Ўзбекистонда чех капитали иштирокидаги 44 та компания фаолият юритмоқда. Ўзбекистон ва Чехия ўртасидаги товар айирбошлаш ҳажми сўнгги етти йил ичида олти бараварга ошди ва 2024 йил якунига кўра 434,6 миллион долларни ташкил этди.

Давра суҳбатида Чехиянинг S-I Industries, Kompelson, Diamo, Doctor Muller Pharma, Era, Pragoimex, SAZ, Skoda Transportation, Zimatechnik и ZVVZ Engineering каби 20 дан ортиқ йирик компаниялари иштирок этди. Унда Ўзбекистон транспорт, озиқ-овқат, фармацевтика каби иқтисодиёт тармоқлари, туризм, таълим ва бошқа соҳалардаги лойиҳа таклифлари тақдим этилди.

Дастур доирасида ташкил қилинган G2B музокараларида тадбиркорлар ўзаро манфаатли лойиҳалар ҳамда савдо шартномаларини биргаликда амалга ошириш механизмларини муҳокама қилишди.

Ташриф якунлари бўйича чех компаниялари билан қатор келишувларга эришилди, Ўзбекистон-Чехия ҳукуматлараро комиссияси йиғилишининг баённомаси ҳамда Ўзбекистон Республикаси Техник жиҳатдан тартибга солиш агентлиги ва Чехия стандартлаштириш, метрология ва синов идораси ўртасида келишув имзоланди.