Пойтахтимизда савдо-иқтисодий ҳамкорликни мустаҳкамлаш мақсадида Сичуан-Тошкент бизнес форуми бўлиб ўтди

Тошкент, Ўзбекистон (UzDaily.uz) — 2025 йил 23 сентябрь куни ХХРнинг Сичуан провинцияси делегацияси ташрифи доирасида Тошкент шаҳрида “Сичуан – Тошкент” бизнес-форуми бўлиб ўтди.

Тадбир савдо-иқтисодий ва инвестициявий ҳамкорликни ривожлантиришга қаратилди. Унда Хитой Компартияси Сичуан вилояти Сиёсий бюроси доимий қўмитаси аъзоси Пубу Дунзҳу, Ўзбекистон Республикаси Инвестициялар, саноат ва савдо вазири ўринбосари Илзат Касимов, Тошкент шаҳар ҳокимлиги, шунингдек икки давлат тадбиркорлари иштирок этди.

Форум Ўзбекистоннинг инвестиция салоҳиятига бағишланган тақдимот билан бошланди. Қайд этилишича, Ўзбекистон ва Сичуан ўртасидаги савдо ҳажми Марказий Осиёдаги энг юқори кўрсаткични ташкил этади. Қўшма корхоналар сони тез суръатлар билан ортмоқда - жорий йилда 800 дан ортиқ янги компания рўйхатдан ўтказилиб, уларнинг умумий сони 4,5 мингга етди.

Форум доирасида ҳамкорлик тўғрисида келишувлар имзолаш маросими ҳамда “Донгфанг Элестрис” компаниясининг Марказий Осиё минтақавий маркази тантанали очилиши бўлиб ўтди.

Шунингдек, Илзат Касимов ва Пубу Дунзҳу ўртасида музокаралар бўлиб, унда энергетика, геология, кимё саноати, транспорт, қишлоқ ва сув хўжалиги соҳаларида ҳамкорлик истиқболлари муҳокама қилинди.

Тадбир якунида Тошкент ва Сичуан ўртасидаги савдо-иқтисодий алоқаларни янада чуқурлаштиришга ўзаро тайёрлик билдирилди.