Пойтахтимизда кореялик инвесторлар иштирокида замонавий молия маркази – “BoMI молия маркази” очилди

Тошкент, Ўзбекистон (UzDaily.uz) — Тошкент шаҳрида янги молиявий марказ - BoMI Finance Centerning тантанали очилиш маросими бўлиб ўтди. Тадбирда Ўзбекистон Республикаси Инвестициялар, саноат ва савдо вазири ўринбосари Илзат Касимов, Корея Республикасининг Ўзбекистондаги Фавқулодда ва Мухтор Элчиси Вон До Ён ҳамда BoMI компанияси Бош директори Ким Док Ён иштирок этди.

Янги мажмуа 30 қаватли, баландлиги 143,86 метр ва умумий майдони 88 минг квадрат метрдан ортиқ бўлган замонавий иншоотдир. Бинода халқаро стандартлар асосида қурилиш ишлари амалга оширилиб, 9 баллгача бўлган зилзилаларга бардошлилик таъминланган. Унда 12 та юқори тезликдаги интеллектуал бошқарув тизимига эга лифт, шунингдек, қарийб 500 та автотураргоҳ ўрни, жумладан электромобиллар учун махсус жойлар мавжуд.

BoMI Finance Centerning Ўзбекистон ва Корея Республикаси ўртасидаги бизнес ҳамкорлигининг янги босқичини ифодалайди. Бугунги кунда Жанубий Кореянинг Ўзбекистонга киритилган тўғридан-тўғри инвестициялари ҳажми $8 миллиарддан ошди, мамлакатимизда корейс капитали иштирокидаги 671 та корхона фаолият юритмоқда. Умумий қиймати $4,8 миллиард бўлган 92 та қўшма лойиҳа амалга оширилмоқда.

Марказнинг очилиши икки давлат ўртасидаги иқтисодий ҳамкорликни янада мустаҳкамлаш сари муҳим қадам бўлиб, Ўзбекистонда халқаро бизнес учун янги имкониятларни яратади.