Тошкент, Ўзбекистон (UzDaily.uz) — Жорий йил 7 апрель куни Ўзбекистон Савдо-саноат палатасида Палата раиси ўринбосари Дилшод Расулов ва Польшанинг Дрохичин шаҳри ҳокими жаноб Войсех Боржим ўртасида учрашув бўлиб ўтди.

Польша делегацияси таркибига қишлоқ хўжалиги, қурилиш, туризм ва логистика соҳаларида фаолият юритаётган тадбиркорлар кирди. Учрашув давомида томонлар қўшма лойиҳаларни амалга ошириш, ўзаро савдо ҳажмини ошириш ва инвестицион ҳамкорликни йўлга қўйиш масалалари юзасидан фикр алмашдилар.

Ўзбекистон маҳсулотларини Европа Иттифоқи бозорига чиқариш, туризм алоқаларини кучайтириш ва Польша инвестицияларини маҳаллий иқтисодиётга жалб қилиш бўйича амалий таклифлар муҳокама қилинди.

Томонлар ўзаро манфаатли алоқаларни фаоллаштириш ва ишбилармон доиралар ўртасида тўғридан-тўғри ҳамкорликни йўлга қўйишдан катта қизиқиш билдиришди. Учрашув якунида келгусида қўшма тадбирлар, форумлар ва бизнес-миссияларни ташкил этиш бўйича келишувга эришилди.