Тошкент, Ўзбекистон (UzDaily.uz) — 28 февраль куни вилоят ҳокими Ботир Зарипов покистонлик ишбилармонлар делегациясини қабул қилди.

Учрашувда шунингдек, Ўзбекистоннинг Покистон Ислом Республикасидаги элчиси Алишер Тўхтаев, Ўзбекистон Республикасчи Савдо-саноат палатаси раиси ўринбосари Ҳалимжон Сафаров, Ўзбекистоннинг Покистон Ислом Республикасидаги  элчихонаси савдо маслаҳатчиси Баҳром Юсупов қатнашди.

Мулоқот аввалида Ботир Зарипов меҳмонларни Бухорога ташрифи билан қутлади ва мамлакатимизда иқтисодиётнинг барча тармоқларида бозор механизмлари жорий қилинаётганини, бизнес ривожини чеклайдиган тўсиқлар бартараф этилганини алоҳида  таъкидлади. Тараққиёт стратегияси асосида хорижий бизнес иштирокини кенгайтириш борасидаги ишлар изчил давом эттирилаётгани эътироф этилди. 

Қайд этилганидек, Ўзбекистон ва Покистон мамлакатлари тарихидаги сўнгги саккиз йил ҳар икки давлат ўртасидаги яқин дўстлик, ижтимоий-иқтисодий ҳамкорлик алоқаларининг чўққиси бўлди. Иқтисодий самарадорлик билан бир қаторда, маданий-гуманитар алоқалар ва зиёрат туризми соҳасида ҳам замонавий тизим йўлга қўйилган. Ҳамкорликнинг бошқа йўналишларида ҳам имкониятлар мавжуд.

Бугунги кунда Покистон иқтисодий жиҳатдан дунёдаги тез ривожланаётган ўрта даромадли мамлакатлардан биридир. Кўп аҳоли ва улкан иқтисодий имкониятларга эга, саноати ривожланган мамлакат. Тўқимачилик, фармацевтика, қишлоқ хўжалиги, қурилиш материаллари соҳаларида илғор ҳисобланади.

— Бу соҳалар ривожига катта эътибор қаратаётган мамлакатимиз учун Покистоннинг тажрибаси ва технологиялари муҳим. Покистон учун ҳам изчил ривожланаётган, инвесторларни қўллаб-қувватлаётган Ўзбекистон истиқболли ҳамкор деб ҳисоблаймиз, – деди Ботир Зарипов.

Қайд этиш лозимки, сўнгги 8 йилда хорижий инвестициялар иштирокидаги корхоналар сони 5 бараварга ошди. Ҳозирда ҳудудда 450 дан ортиқ хорижий инвестиция иштирокидаги корхоналар фаолият кўрсатаётган бўлса, вилоятимиз тадбиркорлари ва Покистон Ислом Республикаси  компаниялари ҳамкорлигида 12 та корхона рўйхатдан ўтган.
Покистон Ислом Республикаси ва Бухоро вилояти ўртасидаги ўзаро ташқи савдо айланмаси 2024 йилда 6,0 млн. долларни ташкил этиб, 2023 йилнинг мос даврига нисбатан 60 фоизга ўсган (2023 йилда 3,6 млн. доллар).  Шу жумладан, экспорт ҳажми 4,5 млн. доллар ва импорт ҳажми 1,5 млн. долларга етган.

Сўнгги йилларда мамлакатимизга, хусусан, Бухорога келаётган сайёҳлар ва меҳмонлар сони ҳам жадал суръатлар билан ортиб бормоқда.  Йиллик хорижий сайёҳлар сони 1,7 миллионни ташкил этаётган бўлса, 2024 йилда покистонлик сайёҳларнинг сони 1200 нафарни ташкил этди.

— Албатта, бу кўрсаткичлар биз учун жуда кам. Келгусида биз Покистон Ислом Республикасидан Бухоро вилоятига ташриф буюрувчи сайёҳлар сонини ҳамда ташқи савдо айланмаси ва тўғридан-тўғри хорижий инвестициялар ҳажмини оширилишига ишонамиз. Бунга бугунги учрашувимиз катта майдон вазифасини ўтайди, – деди вилоят раҳбари. 

Музокарада Бухоро вилоятида инвесторлар ва ишбилармонлар учун ўзаро манфаатли бўлган, ишга солинмаган жуда катта салоҳият мавжудлиги таъкидланиб, аниқ конструктив таклифлар ўртага ташланди. Покистонлик сармоядорлар мавжуд имкониятлардан фойдаланган ҳолда икки томонлама манфаатли  лойиҳаларни амалга ошириш ниятида эканликларини билдиришди.

Вилоят раҳбари Бухоро вилояти ҳокимлиги Покистон ҳудудлари билан амалий ва ўзаро манфаатли ҳамкорлик ўрнатиш, янги лойиҳаларни ишлаб чиқиш, энг муҳими – инвестор ва ишбилармонларга ҳар томонлама қулай шароитлар яратиш учун мунтазам ишлашга тайёрлигини билдирди. Тадбиркорлар фаолияти учун вилоятда эркин инвестицион  муҳит мавжудлиги ва тадбиркорлар фаолияти  қонун ҳимоясида эканлигини қайд этди. Шундан келиб чиқиб, учрашувда амалга ошириладиган ишлар юзасидан келишиб олинди.