Тошкент, Ўзбекистон (UzDaily.uz) —Покистонлик ишбилармонлар делегацияси “Бухоро саноатни ривожлантириш комплекси” махсус саноат паркида бўлиб, ҳудудда амалга оширилаётган ишлар билан танишишди.

Қайд этиш жоизки, ҳозирда илғор хорижий тажриба асосида Когон туманида минг гектарда “Бухоро саноатни ривожлантириш комплекси” махсус саноат парки барпо қилинмоқда.

Мазкур объектнинг ташкил этилиши натижасида Бухоро вилоятига тўғридан-тўғри инвестицияларни жалб қилиш, юқори технологияларга асосланган замонавий саноат қувватларини ишга тушириш, ички ва ташқи бозорлар учун рақобатбардош тайёр маҳсулотлар ишлаб чиқаришни йўлга қўйиш бўйича инвестиция лойиҳаларини амалга ошириш ҳамда янги иш ўринларини яратилишига эришилади.

Биринчи босқичда 300 миллион долларлик лойиҳа амалга оширилади. Бу – вилоят иқтисодиётига йилига 250 миллион доллар қўшилган қиймат, 2 мингта иш ўрни, 250 миллиард сўм солиқ тушуми ва 100 миллион доллар экспорт беради.

Лойиҳа бош режаси бўйича ҳозирда “Бухоро-Қарши” автомагистраль йўлидан саноат парки барпо этилаётган ҳудудга қадар 3 кмдан зиёд масофада йўл қурилиши амалга оширилмоқда. Меҳмонлар мазкур йўл бўйида яхши ниятлар билан дарахт ўтқазишди.

Шунингдек, улар саноат паркида инвесторлар учун мавжуд имтиёз ва енгилликлар ҳақида батафсил маълумотга эга бўлишди.