Тошкент, Ўзбекистон (UzDaily.uz) — Ўзбекистон Савдо-саноат палатаси вакиллари ҳамда "Ўзчармсаноат" уюшмаси ва унга аъзо корхоналари Покистонга амалга оширган бизнес-миссияси доирасида ушбу мамлакатнинг чарм саноати билан яқиндан танишди.

“Prime Tanning Industries”, “Siddiq Shafi Group” каби йирик компанияларда бўлиб, халқаро бозор талаблари асосида чарм ишлаб чиқариш жараёнлари ва терини қайта ишлашнинг замонавий усуллари ўрганилди. Шунингдек, лаборатория назорати жараёнларини такомиллаштириш ва синов сертификатларини олиш тизимини Ўзбекистонда жорий этиш масалалари муҳокама қилинди.

“Badre Alam Traders” компанияси билан музокаралар давомида ўзаро ҳамкорлик йўналишлари белгилаб олинди. Хусусан, терини қайта ишлаш соҳасида қўшма ташаббусларни амалга ошириш ва ёрдамчи материаллар ҳамда ярим тайёр чарм маҳсулотларини харид қилиш бўйича B2B учрашувлар ташкил этилди. Покистонлик ҳамкорлар Лаҳор шаҳрида Ўзбекистон чарм маҳсулотлари учун савдо уйини очишга қизиқиш билдирдилар.

Ушбу ташриф икки давлат ўртасидаги савдо-иқтисодий муносабатларни янада мустаҳкамлаш ҳамда чарм саноатида янги истиқболли лойиҳаларни йўлга қўйишга хизмат қилади.