Тошкент, Ўзбекистон (UzDaily.uz) — Хитой Халқ Республикасининг Пекин шаҳрида Ўзбекистон–Хитой савдо-иқтисодий ва инвестиция форуми бўлиб ўтди.

Тадбирда вилоят ҳокимининг ўринбосари - Инвестициялар, саноат ва савдо бошқармаси бошлиғи Нуриддин Мамажонов бошчилигидаги вилоятимиздан 20 нафардан ортиқ расмий ва тадбиркорлардан иборат делегация фаол иштирок этди.

Форум доирасида Фарғона вилоятининг иқтисодий салоҳияти ва миллий қадриятларини намойиш этувчи “Фарғона маҳсулотлари” кўргазмаси ташкил этилди. Унда маҳаллий ҳунармандлар яратган бетакрор ёғоч ўймакорлиги намуналари, нафис керамика буюмлари, шифобахш қуруқ ва янги узилган мевалар, шунингдек, ўзбек миллий матолари – атлас ва адраслар тақдим этилди.

Кўргазмада намойиш этилган маҳсулотлар хитойлик тадбиркорларда катта қизиқиш уйғотди. Тадбир доирасида ҳужжатлар алмашинуви бўлиб ўтди.