Тошкент, Ўзбекистон (UzDaily.uz) — 25 февраль куни Олий Мажлис Сенатида Парламентлараро иттифоқнинг 150-юбилей ассамблеясини ўтказиш бўйича Ташкилий қўмитанинг навбатдаги йиғилиши бўлиб ўтди.

Йиғилишни Олий Мажлис Сенати Раисининг биринчи ўринбосари Содиқ Сафоев олиб борди.

Аввал хабар берилганидек, Парламентлараро иттифоқнинг 150-юбилей ассамблеяси Ўзбекистон Республикаси Президенти Шавкат Мирзиёевнинг таклифига асосан 2025 йил 5-9 апрель кунлари Ўзбекистонда бўлиб ўтади.

Ўзбекистон Республикаси Президентининг 2025 йил 17 январдаги тегишли қарори билан Ташкилий қўмита таркиби ҳамда Чора-тадбирлар режаси тасдиқланган.

Йиғилишда қайд этилганидек, кўплаб мамлакатлар парламентлари раҳбарлари ва аъзолари ҳамда халқаро ташкилотларнинг делегациялари ассамблеяда иштирок этиш учун рўйхатдан ўтган.

Шунингдек, ассамблеянинг “Ижтимоий тараққиёт ва адолат учун парламент ҳаракати” мавзуси доирасида бутун дунё парламентлари аҳолини ижтимоий ҳимоя қилиш, камбағалликни қисқартириш, ҳуқуқ устуворлигини таъминлаш борасида амалга оширилаётган ислоҳотлар ва ўз тажрибалари билан ўртоқлашади. Бир ҳафта давомида Парламентлараро иттифоқнинг қўмиталари томонидан инсон ҳуқуқларини ҳимоя қилиш, гендер тенгликни таъминлаш, илм-фан ва технология, ёшлар масалаларига бағишланган турли тадбирлар ташкил этишга доир чора-тадбирлар белгилаб олинди.

Нуфузли анжуманни юқори савияда ташкил этиш бўйича мутасаддилар олдида турган қатор вазифалар ижроси муҳокама қилинди.