Парламент қўмиталари қонунлар ва давлат дастурларининг бажарилишини назорат қилиш учун кенгайтирилган ваколатларга эга бўлади

Тошкент, Ўзбекистон (UzDaily.uz) — Мажлисда Сенатнинг парламент назорати фаолиятининг асосларини янада мустаҳкамлашга қаратилган қонунчилик таклифи кўриб чиқилмоқда.

Мазкур қонун лойиҳаси билан “Ўзбекистон Республикаси Олий Мажлисининг Сенати тўғрисида”ги Конституциявий Қонунга Сенат қўмиталари томонидан давлат органлари ва улар мансабдор шахсларининг Конституция ва қонунларни, давлат дастурларини ижро этиш бўйича ахборотини эшитиш ваколатини мустаҳкамлашга қаратилган ўзгартириш киритилмоқда.

Шунингдек, “Ўзбекистон Республикаси Олий Мажлиси Қонунчилик палатаси депутатининг ва Сенати аъзосининг мақоми тўғрисида”ги Қонунга тузатиш киритилиб, депутат ва сенатор палатага ҳисобдор орган ёхуд мансабдор шахснинг ҳисоботи ёки ахборотини нафақат палата мажлисида, балки эндиликда ўзи аъзо бўлган қўмита мажлисларида ҳам эшитиш тўғрисида таклиф киритишга ҳақлилиги назарда тутилмоқда.

Бундан ташқари, “Парламент назорати тўғрисида”ги Қонуннинг тегишли моддаларига ўзгартириш киритилиб, Қонунчилик палатаси ва Сенатнинг қўмиталари томонидан давлат органлари ва улар мансабдор шахсларининг Конституция ва қонунларни, Олий Мажлис палаталари ва уларнинг органлари қарорларини, давлат дастурларини ижро этиш, шунингдек ўз зиммаларига юклатилган вазифалар ҳамда функцияларни амалга ошириш бўйича ахборотини эшитиш ваколати аниқ белгиланяпти.

Шу билан бирга, “Вазирлар Маҳкамаси тўғрисида”ги Қонунга ҳам ўзгартиришлар киритиш таклиф этилмоқда. Яъни, қўмита мажлисларида давлат органлари ва уларнинг мансабдор шахсларининг ахборотини эшитишда Ҳукумат тегишли раҳбарларнинг иштирокини таъминлаши акс этмоқда.

Мажлисда қонунчилик таклифи бўйича қарор қабул қилинди.