Тошкент, Ўзбекистон (UzDaily.uz) — Ўзбекистон Савдо-саноат палатаси раиси Даврон Вахабов ва Ўзбекистоннинг Покистондаги фавқулодда ва мухтор элчиси Алишер Тўхтаев ўртасида онлайн учрашув бўлиб ўтди.

Учрашувда Покистон Ислом Республикаси Бош вазири Шаҳбоз Шариф ташрифи натижалари бўйича савдо-иқтисодий ҳамкорликни кенгайтириш, жумладан, Лаҳор шаҳрида Ўзбекистон савдо уйини очиш, Карачи шаҳрида Ўзбекистон маҳсулотлари шоу-руми ва омборини ташкил этиш масалалари муҳокама қилинди.

Учрашув доирасида Ўзбекистон Савдо-саноат палатасининг Покистондаги савдо вакиллари этиб тадбиркор ватандошларимиз тайинланди:

Лаҳор шаҳрида — Дилором Абдуллаева

Карачи шаҳрида — Албина Куртбединова

Шунингдек, суҳбат чоғида Карачи шаҳрида "Made in Uzbekistan" миллий кўргазмасини ташкил этиш ва икки мамлакат ишбилармон доиралари иштирокида Ўзбекистон-Покистон бизнес-форумини ўтказиш масалалари кўриб чиқилди.