Тошкент, Ўзбекистон (UzDaily.uz) — «Ўзбекнефтгаз» АЖ Бошқаруви Раиси ва SLB компаниясининг Осиё минтақаси бўйича Президенти ўртасида ишчи учрашув ўтказилди.

Мулоқотда асосий эътибор Устюрт минтақасидаги конларни бошқариш бўйича Стратегик ҳамкорлик доирасида тузилган шартномани (Field Management Agreement) амалга ошириш масалаларига қаратилди.

Томонлар лойиҳани амалга оширишнинг асосий босқичларини муҳокама қилдилар. Жумладан, ҳамкорликдаги лойиҳани бошқариш гуруҳини (

Joint Project Management Team) шакллантириш ҳамда халқаро даражадаги юқори малакали мутахассисларни лойиҳани тезкор амалга оширишга жалб этишга келишиб олдилар.

Лойиҳанинг биринчи босқичини ишга тушириш юзасидан аниқ қадамлар, жумладан, ташкилий ишлар, инфратузилмани тайёрлаш ва ҳаракатлар режасини келишиш масалалари муҳокама қилинди.

Ҳамкорликнинг истиқболли мақсадлари — ресурслардан самарали фойдаланиш, замонавий технологик ечимларни жорий этиш ҳамда геология-қидирув фаолиятини кенгайтиришга алоҳида эътибор қаратилди.

Комплекс ёндашув ва узоқ муддатли натижаларга йўналиш ҳар икки томон учун устувор сифатида белгиланди.

Учрашувда эришилган келишувларни амалиётда татбиқ этиш ва Ўзбекистоннинг нефть-газ соҳасида барқарор ривожланишга хизмат қилувчи муҳим ташаббусларни биргаликда илгари суришга тайёрлик тасдиқланди.