Ўзбекистоннинг Татаристон билан ҳамкорлиги ривожланмоқда

Тошкент, Ўзбекистон (UzDaily.uz) — Қозон шаҳрида Ўзбекистон Республикаси Олий Мажлиси Сенати Раисининг биринчи ўринбосари Содиқ Сафоев Татаристон Республикаси Раиси Рустам Минниханов билан учрашди.

Суҳбат чоғида Ўзбекистон ва Россия Федерацияси ўртасидаги стратегик шериклик ва иттифоқчилик муносабатлари тобора мустаҳкамланиб бораётгани, бу жараёнда Татаристоннинг ўрни алоҳида экани таъкидланди.

Содиқ Сафоев Рустам Миннихановнинг Татаристонни ҳар томонлама ривожлантириш, Россиянинг энг динамик ва инновацион ҳудудларидан бирига айлантириш йўлидаги фаолиятини эътироф этди.

Учрашувда икки томонлама алоқаларни янада кенгайтириш масалалари муҳокама қилинди. Сўнгги йилларда нефть-газ, нефть-кимё, автомобилсозлик, саноат ва қишлоқ хўжалиги соҳаларида бир қатор қўшма лойиҳалар амалга оширилди.

Шунингдек, Жиззах шаҳрида Қозон федерал университети филиали фаолият юритаётгани ва бу Ўзбекистон ҳамда Татаристон ўртасида таълим соҳасидаги ҳамкорлик самараси экани таъкидланди.

Учрашув якунида томонлар ўзаро алоқаларни янада фаоллаштириш, амалий лойиҳаларни кенгайтириш ҳамда икки халқ ўртасидаги дўстлик ва ҳамжиҳатликни янада мустаҳкамлашга тайёр эканликларини билдирди.