Ўзбекистонлик ҳакамлар ЖЧ–2026да фаолият юритади

Тошкент, Ўзбекистон (UzDaily.uz) — Ўзбекистонлик уч нафар футбол ҳаками 2026 йилги жаҳон чемпионатининг расмий ҳакамлар корпусига киритилади. Мазкур мусобақа 11 июндан 19 июлга қадар АҚШ, Канада ва Мексика стадионларида бўлиб ўтади.

Ўзбекистондан бош ҳакам сифатида Илгиз Танташев тайинланди, унга ёрдамчи ҳакамлар сифатида Андрей Сапенко ва Тимур Гайнуллин фаолият олиб боради.

Турнир 39 кун давом этади ва кенгайтирилган форматда ўтказилади: гуруҳда биринчи икки ўринни эгаллаган жамоалардан ташқари, илк бор учинчи ўринни олган саккизта терма жамоа ҳам 1/16 финал босқичига йўл олади. Шу тариқа, плей-офф босқичи 32 жамоа иштирокида бошланади.

Ўзбекистон миллий терма жамоаси ўз тарихида илк бор ушбу мусобақага йўлланма олди ва K гуруҳида Португалия, Колумбия ҳамда Конго Демократик Республикаси жамоалари билан куч синашади.

Ўзбекистонликлар учун турнир 18 июнь куни Мехико шаҳрида Колумбия терма жамоасига қарши ўйин билан бошланади. Учрашув Тошкент вақти билан соат 08:00 да старт олади. Иккинчи гуруҳ баҳси 23 июнь куни Хьюстон шаҳрида бўлиб ўтади, унда рақиб Португалия терма жамоаси бўлади. Ўйин Тошкент вақти билан соат 23:00 да бошланади.

Гуруҳ босқичи 28 июнь куни Атланта шаҳридаги «Mercedes-Benz Stadium» стадионида Конго Демократик Республикасига қарши ўйин билан якунланади. Учрашув Тошкент вақти билан соат 04:30 да бошланади.