Тошкент, Ўзбекистон (UzDaily.uz) — Жорий йилнинг 23-27 февраль кунлари Ўзбекистон Қишлоқ хўжалиги вазирлиги ҳузуридаги "Маъмурий-хўжалик хизмати" давлат муассасаси директори Ш. Шарифов бошчилигидаги делегация Эронга ташриф буюрди.

Ташриф давомида икки томонлама ҳамкорликни мустаҳкамлашга қаратилган қатор келишувлар имзоланди. Хусусан, Эрон Қишлоқ хўжалиги техникаси ишлаб чиқарувчилар уюшмаси (АТМАК) билан қишлоқ хўжалигини механизациялаш ва технологик ҳамкорликни кенгайтириш бўйича меморандум имзоланди.

Шунингдек, “Sirang UAV” компанияси билан Ўзбекистонга замонавий қишлоқ хўжалиги дронларини етказиб бериш ва техник хизмат кўрсатиш инфратузилмасини яратиш бўйича келишувга эришилди.

Бундан ташқари, “Bazargan Kala Co.”, Миллий марказ (AKIS) ва “Маъмурий-хўжалик хизмати” ўртасида Nutritech бренди остида ишлаб чиқарилган 40 турдаги ўғит ва пестицидларни Ўзбекистонда синовдан ўтказиш ва босқичма-босқич маҳаллийлаштириш бўйича шартнома имзоланди.

Мазкур ташриф Ўзбекистон ва Эрон ўртасидаги қишлоқ хўжалигидаги ҳамкорликни мустаҳкамлаш, инновацион технологияларни жорий этиш ва янги бизнес алоқаларини ривожлантиришга хизмат қилади.