Тошкент, Ўзбекистон (UzDaily.uz) — Қишки таътил олдидан олий ва ўрта махсус таълим муассасалари талабалари учун ички транспорт қатновларида чегирмалар тақдим этилади. Бу ҳақда "Ўзбекистон темир йўллари" ва Uzbekistan Airways компанияларининг матбуот хизмати хабар берди.

«Ўзбекистон темир йўллари» компанияси томонидан ҳар йилги Янги йил акцияси 2024 йил 23 декабрдан 2025 йил 10 январигача амал қилади.

Бу даврда талабалар умумий тарифдан 50% чегирма билан чипталар харид қилишлари мумкин.

Бироқ, ушбу чегирма юқори қулайликка эга (SV/VIP) вагонларига ва Afrosiyob тезюрар поездларига татбиқ этилмайди.

Uzbekistan Airways компанияси ҳам ички йўналишлар бўйича барча эконом-класс рейслари учун талабаларга 50% гача чегирмалар тақдим этади.

Акция 2024 йил 23 декабрдан 2025 йил 7 январигача амал қилади.

Чегирмадан фойдаланиш учун давлат таълим муассасасида таҳсил олишни тасдиқловчи ҳужжат тақдим этиш талаб этилади. Шунингдек, чегирма фақат асосий йўловчи тарифига татбиқ этилиб, солиқлар, йиғимлар ва қўшимча тўловларга тааллуқли эмаслиги маълум қилинган.

Олий ўқув юртлари ва коллежлар талабалари учун қишки таътил 2024 йил 25 декабрда бошланиб, 2025 йил 7 январгача давом этади.