Тошкент, Ўзбекистон (UzDaily.uz) — Ўзбекистон Республикаси Президенти Шавкат Мирзиёев 2025 йил 11 июль куни «Ўзбекистон Республикаси фуқаролари, хорижий фуқаролар ва фуқаролиги бўлмаган шахсларни яшаш ва бўлиш жойлари бўйича рўйхатдан ўтказиш тўғрисида»ги Қонунни имзолади.

Ушбу ҳужжат маъмурий жавобгарлик тўғрисидаги Кодексга бир қатор ўзгартишлар киритади. Хусусан, паспорт режими ва мамлакат ҳудудида бўлиш қоидаларини бузганлик учун жарима миқдорлари аниқлаштирилди ва енгиллаштирилди. Янги қоидалар Қонун имзоланган пайтдан бошлаб кучга кирди.

Жумладан, Кодекснинг 223-моддасига ўзгартиш киритилди:

Ўзбекистон фуқаросининг паспортисиз ёки ID-картасиз яшаши, ёхуд муддати тугаган ва алмаштирилиши лозим бўлган ҳужжатлар билан яшаши, шунингдек, хорижий фуқаролар ва фуқаролиги бўлмаган шахсларнинг ID-картасиз (яъни яшаш гувоҳномасисиз) ёки амалда бўлмаган ҳужжатлар билан яшаши — ½ асосий ҳисоблаш миқдори (АҲМ) миқдорида жарима билан жазоланади. Илгари бу жарима ½ дан 3 АҲМгача бўлган. Агар ушбу қонунбузарлик бир йил давомида такрорланса, жарима миқдори 3 АҲМни ташкил этади (илгари 5 АҲМ эди).

Паспорт, ID-карта ёки хорижий паспортни йўқотиш ёки шикастлантириш, шунингдек, хорижий фуқаролар ва фуқаролиги бўлмаган шахсларга тегишли ҳужжатларга нисбатан шундай ҳолатлар учун ягона жарима белгиланди — 1 АҲМ. Илгари бу жарима ½ дан 3 АҲМгача оралиқда эди. Агар ушбу ҳуқуқбузарлик бир йил ичида такрорланса, 5 АҲМ миқдорида жарима қўлланилади.

Яшаш ёки бўлиш жойи бўйича рўйхатдан ўтмасдан яшаш учун жарима миқдори энди 3 АҲМни ташкил этади (илгари ½ дан 3 АҲМгача эди), такрорий қоидабузарлик учун — 5 АҲМ.

Фуқаролар ёки хорижликларни ҳужжатсиз ёки рўйхатдан ўтказмасдан ўз уйларида яшашга йўл қўйган шахслар, аввалгидек, 5 АҲМ миқдоридаги жаримага тортилади. Агар бу ҳолат такрорланса — жарима 10 АҲМгача оширилади.

Қонун шунингдек, маъмурий жавобгарликдан озод этиладиган фуқаролар тоифасини белгилайди:

– 18 ёшгача бўлган шахслар;

– 60 ёш ва ундан катта ёшдаги шахслар;

– тўлиқ давлат таъминотидаги шахслар;

– фавқулодда ҳолатлар, табиий ёки техноген ҳалокатлар, маиший фалокатлар (ёнгин, уй-жойнинг вайрон бўлиши ва ҳ.к.)дан жабрланганлар;

– суд томонидан ҳужжатлари вақтинча тўхтатилган айбланувчилар ва судланувчилар;

– жазони ўтаётган ёки озод қилингач бир ой ичида ҳужжатларни тиклаш учун мурожаат қилган шахслар;

– уларга нисбатан жиноят содир этилгани оқибатида ҳужжатларини йўқотган шахслар;

– хизмат ёки фуқаролик бурчини адо этишда, шунингдек, фавқулодда ҳолатлар ёки зарур мудофаа натижасида ҳужжатларини йўқотган шахслар — тегишли тасдиқ бўлган ҳолларда.

Бундан ташқари, Маъмурий жавобгарлик тўғрисидаги кодекснинг 223-3-моддасига мувофиқ, паспорт ёки ID-картани гаров сифатида бериш учун белгиланган жарима миқдори энди 2 АҲМни ташкил этади (илгари 10 дан 15 АҲМгача бўлган).

Паспорт ёки ID-картани ноқонуний тарзда олиб қўйиш учун эса эндиликда аниқ жарима белгиланди — 10 АҲМ (аввал 10 дан 15 АҲМгача эди).