Тошкент, Ўзбекистон (UzDaily.uz) — Ўзбекистонда 2024 йил якуни бўйича ўртача ойлик маош 5,36 млн сўмни ташкил этди. Бу кўрсаткич 2023 йил якунидаги 4,56 млн сўмдан ошди. Бу ҳақда Статистика агентлиги хабар берди.

2024 йилнинг январь-декабрь ойларида ўртача номинал иш ҳақининг энг юқори кўрсаткичлари Тошкент шаҳри (9 072,4 минг сўм), Навоий вилояти (6 766,1 минг сўм), Тошкент вилояти (5 097,9 минг сўм), Андижон вилояти (4 616,1 минг сўм) ва Бухоро вилояти (4 343,9 минг сўм)да қайд этилган.

Шунингдек, иш ҳақининг ўсиш суръатлари бўйича етакчи ҳудудлар қуйидагилар бўлди: Тошкент шаҳри (121,4%), Самарқанд вилояти (117,6%), Сирдарё вилояти (116,7%), Наманган вилояти (116,5%) ва Фарғона вилояти (115,1%).

2024 йил 1 октябрдан эътиборан минимал иш ҳақи миқдори ўзгартирилиб, 1 155,0 минг сўм этиб белгиланди.

Иқтисодий фаолият турлари бўйича маошлар
2024 йил январь-декабрь ойларида энг юқори ўртача ойлик маош банк, суғурта, лизинг ва кредит воситачилиги соҳаларида қайд этилди – 15,26 млн сўм.

Ахборот ва алоқа соҳасида иш ҳақи 13,15 млн сўмга, ташиш ва омборлаштиришда – 8,11 млн сўмга, саноат соҳасида – 6,44 млн сўмга етди. Бу кўрсаткичлар республика бўйича ўртача даражадан юқори.

Шу билан бирга, таълим, соғлиқни сақлаш ва ижтимоий хизмат кўрсатиш соҳаларида ўртача иш ҳақи нисбатан паст бўлиб, тегишли равишда 3,64 млн сўм ва 3,41 млн сўмни ташкил этди.

Саноат соҳасида энг юқори иш ҳақи қазиб олиш саноатида (9,13 млн сўм), электр таъминоти, газ, буғ ва ҳавони кондиционерлаштиришда (7,47 млн сўм), шунингдек, қайта ишлаш саноатида (6,18 млн сўм) қайд этилди.

Саноатдаги энг юқори иш ҳақи Навоий вилояти (9,66 млн сўм), Тошкент шаҳри (7,48 млн сўм), Андижон вилояти (6,6 млн сўм), Тошкент вилояти (6,23 млн сўм) ва Қорақалпоғистон Республикасида (6,1 млн сўм) кузатилди.

Қурилиш соҳасида энг юқори иш ҳақи Тошкент вилоятида (8,57 млн сўм), Навоий вилоятида (7,32 млн сўм) ва Тошкент шаҳрида (7,17 млн сўм) қайд этилди.

Савдо соҳасида, айниқса, автомобиль ва мотоцикллар савдоси ҳамда таъмирлаш соҳасида иш ҳақи энг юқори бўлиб, 7,77 млн сўмни ташкил этди. Энг паст кўрсаткич бошқа чакана савдо соҳасида кузатилди – 5,67 млн сўм.

Савдо соҳасида энг юқори иш ҳақи Тошкент шаҳри (7 млн сўм), Жиззах вилояти (6,89 млн сўм) ва Бухоро вилоятида (5,49 млн сўм) қайд этилди. Энг юқори ўсиш суръатлари Жиззах вилояти (245,9%), Сурхондарё вилояти (161,0%) ва Фарғона вилоятида (159,3%) кузатилди.

Ташиш ва омборлаштириш соҳасида иш ҳақининг энг юқори кўрсаткичи омбор ва транспорт ёрдамчи хизматлари (9 599,9 минг сўм)да кузатилди. Энг паст иш ҳақи почта ва курьер хизматларида қайд этилди (3 875,0 минг сўм).

Энг юқори иш ҳақи Самарқанд вилояти (9 921,4 минг сўм), Тошкент шаҳри (9 280,2 минг сўм) ва Хоразм вилояти (8 944,9 минг сўм)да қайд этилди.

Ахборот ва алоқа соҳасида энг юқори иш ҳақи компьютер дастурлаштириш, консалтинг ва ёрдамчи хизматларда кузатилди – 18 288,6 минг сўм. Энг паст иш ҳақи алоқа соҳасида қайд этилди – 10 917,1 минг сўм.

Ахборот ва алоқа соҳасида энг юқори иш ҳақи Тошкент шаҳри (14 857,6 минг сўм), Андижон вилояти (9 024,6 минг сўм) ва Самарқанд вилоятида (8 944,7 минг сўм) қайд этилди.

Банк, суғурта ва кредит воситачилиги соҳасида энг юқори иш ҳақи суғурта ва қайта суғурта қилишда кузатилди – 17 848,5 минг сўм. Энг паст иш ҳақи молиявий хизматларда қайд этилди – 15 004,1 минг сўм.

Энг юқори иш ҳақи Тошкент шаҳри (18 904,4 минг сўм), Андижон вилояти (14 317,9 минг сўм) ва Навоий вилоятида (13 258,1 минг сўм) қайд этилди.

Таълим соҳасида энг юқори иш ҳақи олий таълимда (8 562,1 минг сўм), энг паст иш ҳақи эса мактабгача таълимда (1 963,3 минг сўм) кузатилди.

Соғлиқни сақлаш соҳасида энг юқори иш ҳақи Тошкент шаҳри (4 313,9 минг сўм), Хоразм вилояти (3 700,8 минг сўм) ва Қорақалпоғистон Республикасида (3 648,4 минг сўм) қайд этилди.